Wonn isch die Adventslieder zesomme nemm, donn redden se alsfort vun de Dunkelheite in dere Welt, vun de Ängscht unn all denen Soije, die wo mer uns mache, vun Kriesch unn Jammer unn Elend - unn sie setzen uff des Onnere.
Selbscht wonn de moonsch es wär alles noor noch schwarz, denk droo: Es gibt noch ebbes Onneres, was doi Leewe bestimme will.
Es gibt e Lischt, was rein unn heilisch midde in de Dunkelheit uffschoint.
Die Nacht ist vorgedrungen, der Tag ist nicht mehr fern
So sei nun Lob gesungen dem hellen Morgenstern
Auch wer zur Nacht geweinet, der stimme froh mit ein
Der Morgenstern bescheinet auch deine Angst und Pein.

Jochen Klepper hott dess Lied geschrebb, 1938. Unn doo wars um ihn schon sehr dunkel. Unn die Dunkelheit hott en bald ganz metgenumm unn in en Strudel gerisse, dem er sisch noor noch dorsch Selbstmord entziehe konnt, sesomme met soiner Fraa, die war Jüdin.
Unn dennoch, ja dennoch singt er vun dem gonz Onnere. Von dem, was om  aus de Dunkelheite rausholt.
De Martin Luther hott emol e werklisch heiß´ Beschreiwung abgeliwwert  fer des Onnere unn gesahd: „Gott, der iss wie en glierischer Backofe voller Lieb´...".
En Backofe. E Backhaus, e Backes. Auße met sauwere Ziejele gemauert unn innewennisch mit Schammottstaan ausgeschlaa. Unn bevoor de backe konntst, hoste erscht emol e Feier mache misse. E rischdisch Feier. Unn dann alles ausgliee losse unn net zu schnell mem Auskehre. Wann de vorm uffene Deersche gestann hosch, die Hitz hott der de Oorem genemm. Unn dann enenn mem Teig unn Gedanke gehall, dess er net vebrennt.
Unn donn: Frisch Brot... Mmmh... En Backofe.
Unn die ganz Erd  werd am Leewe gehall unn ernährt unn vor unserer Kält bewahrt. Unn es bleibt warm genunk fer allmenonmner unn alles uff dere Welt.
Noch manche Nacht wird fallen auf Menschenleid und -schuld
Doch wandert mit uns allen der Stern der Gotteshuld.
Beglänzt von seinem Lichte hält euch kein Dunkel mehr
Von Gottes Angesichte kam euch die Rettung her. (EG 16, 1 und 4)
Mer misste noor meh uff die Lieb setze...
Isch winsch eisch weiter en scheene Advent ... unn uff bald emol widder...