Seerscht emol iss mer begeistert vun de Name: Sie sinn wie en Traum, voller Fantasie komme se dooheer: Ghislaine de Feligonde - Lischtköönischin Lucia - Eden Rose -Frühlingsgold - A Shropshire Lad'- Gloria Dei -...
Unn wonn de se donn siehst: Du bist hee unn eweck.
Isch habb´s vun Rose. Isch bin doo rein unn heilisch närrisch, also en Roseverrickter. Unn wonn se donn in aller Pracht doo stehn  unn entfalte all ehre Herrlischkeit fer e paar Daa, duften der in de Noos unn mache disch seelisch... E Wunner...
Im Summer. Vier Monat´ long, Juni, Juli, Auguscht September. Desshalb iss dess Lied vun heit oomend aach so e bissje neewer de Kapp:
Es ist ein Ros entsprungen aus einer Wurzel zart
Wie uns die Alten sungen, von Jesse kam die Art
Und hat ein Blümlein bracht
Mitten im kalten Winter
Wohl zu der halben Nacht (EG 30,1)
Noo, midde im kalde Winder bliehn die Rose net. Doo soin se schun e bissje erunnergeschnett, angehäufelt unn halle Ruh.
Unn donn heer isch schun die neunmalkluuche Besserwisser, die uns, de Christe, schun immer vorgehalle hawwe, dess der gonze Krom jo noor unserer Fantasie entspringe deht.
De Himmel es klassische Wolkenkuckucksheim unn jetzt aach noch Rose midde im Winter... Alles doch noor Träume-reie unn Fantasie.
Dodebei geht joo ohne Fantasie gar nix. Hot selbscht de alt Einstein gewisst: „Fantasie ist wichtiger als Wissen, denn Wissen ist begrenzt" hot er gesaacht. Unn hot wahrschein-lisch aach gewisst, dess unser Fantasie in de Laach is, aach die Werklischkeit ze veännere.
Wonn de net vorher devun träumst, wie dess soi könnt, wonn de se zu eerscht Mol kisst, werste dess heißbegehrte Weibsbild niemols in doim Arm halle.
Wahrscheinlisch wars ihr Fantasie, die moi Mudder veanlasst hott, im Nowember unn Dezember 1970 ihr Rosebeet noch net zerickzeschneide. Unn so hott se moim Vadder on soim 50. Geburtstaach fuffzisch Rose in e Waas stelle könne - vum eischene Rosebeet. Es war de fuffzehnte Dezember -- so wie heit. Genau vor ooneverzisch Johr.
Unn saachen mer net, dess es noor Fantasie war. Es war´n werklisch fuffzisch Rose.
Midde im Winder. Es iss veel möschlisch, wommer on unsere Träume feschthalle...
Isch winsch eisch weiter en scheene Advent...