....wird unterm Baum entschieden

„Weihnachten wird unter dem Baum entschieden." Den Satz habb isch die Daa doo in de Radiowerbung geheert: Aha.
Woihnachte werd unnerm Boom entschiede.
Also bleiwe Se noor uff Ballhöhe, bis zur endgültische Entscheidung gut im Trenning unn vor allem net kronk odder wie so veele Kräcks zur Zeit: leergebrennt.
Also bloß net lockerlosse.
Schließlisch geht's um Woihnachte. Sie hawwe vun heit gereschent noor noch zeh Daa.
Sie müsse vor allem all die bunte Beilaacheblädderscher in de Zeidung vun vorne bis hinne studdiern, ob Ihne net doch irschendwo so e Schnäbbsche dorsch die Labbe geht.
Unn donn jeden Daach ins Städtsche.
Sie misse, wonns um Woihnachte geht, perfekt soi, unn wonn Sie moone, sie wärns schunn, nix, nix. Jeder konn sisch noch steischern unn noch besser werrn. Doo derf net de kloonste Zweifel uffkumme.
Wer sisch woihnachtsmäßisch schont, braucht sisch hinner-her, also om eerschte Woihnachtsdaach, net ze wunnern, wonn die gonz Mischpooche doo hockt unn macht longe Gesischter.
Unn dess wolle Se doch net, odder?
Was heer isch doo?
Sie hawwe den Heip um Woihnachte satt?
Es werd sisch net gedrickt.
Unner ner Gons mache mers net. Vun weesche, die losse mer uns bringe. Nix, die werd selbscht gerobbt unn in gutem Schmalz gebacke. Unna aach de Kartoffelbrei, der kimmt net aus de Tutt, der wird mit guter Sahne gestampft. Unn en Naachdisch, allemol. Kreem brüllee. Wie, Sie hawwe koon Flombierbrenner um de Zucker uff de Kreem ze brülliern? Dess gibt's doch gar nit...
Unn wie wolle Sie doo Woihnachte fer sisch entscheide?
Unnerm Boom, vesteht sich?
Nadierlisch könne Se jetzt aach saache, es wär joo jetzert erscht Advent, unn Sie dähten glei so e halb Stündsche gonz ruisch im Gesongbuch leese, oons vun dene alte Lieder.
Oh Heiland reiß die Himmel auf,
 herab, herab vom Himmel lauf.
Reiß´ab vom Himmel Tor und Tür
Reiß´ab, wo Schloss und Riegel für.
Nadierlisch kenne Se dem noodenke. Dess vum Himmel die Redd iss.
Unn dess er uffgeht, uffreißt. Midde unner uns.
Unn nadierlisch könne Sie aach saache, dess Ihne dess wischdischer iss wie die Rennerei unn Hetzerei.
Gut, gut es iss Ihr' Entscheidung. Isch wollt Sie aach gar nit unner Druck setze, wollt Sie joo nur druff hinweise, desses um Woihnachte geht.
So - odder so...
Isch winsch Ihne weiter en scheene Advent.