Hoste was? -Noo. Ei allemol hoste was. -Was soll isch donn hawwe?
Du redst de gonze Moind koo Wort, guckst noor in doi Zeidung unn isch habb es Gefiehl, du waaßt noch net emol, was de gelese host.
-Wonn isch der´s doch saach, isch hab nix.
Doo hocke se jetzert om Kaffeedisch unn sie merkt, doo iss ebes zu in ihm, unn sie kennt en joo schunn e par Johr unn sie waaß gonz genau, dess er ebbes hott. Er hott oofach zugemacht.
Unn doo fellt ihr des alte Adventslied oi:
Macht hoch die Tür, die Tor macht weit
Es kommt der Herr der Herrlichkeit
Ein König aller Königreich, ein Heiland aller Welt zugleich
Der Heil und Leben mit sich bringt...EG 1,1
Horsch moin Guter, sagt sie,  isch waaß joo dess es dir schwerfällt, awwer denk droo, dess es oom veel besser geht, wommer mitenonner redd'.

Erinner disch on doi dunkle Stunne, an die Nacht, wo de vor lauter Vezweiflung alsfort im Haus die Treppe erunner unn enuffer bist - unn donn hoste do owwe om Fenschter gestonn, weil doi Freundin dir de Krembel heegeschmisse hott.
Waaßtes noch?
-Isch kennt´s mole. Siehste. Unn donn? -Donn iss hinner mir e Deer uffgong, unn die Stimm vun moim Freund Wolfgong hott gesaacht: Wievel mol willsten noch die Treppe enuff un enunner ? Kumm erenn unn redd. De Konjack iss schun uff.
Unn donn? Vezehl mer jetzert noor nix vum Konjack unn eierm Kater om neechschte moind...Er lacht.
-Ei ja, isch habb em halt alles vezeehlt unn hab geflennt unn gekresch - unn donn hatt isch hinnerher es Gefiehl, desses Leewe aach weitergehe konn - ohne sie.

Siehste, mir iss vorhee es alte Adventslied Macht hoch die Tür engefall. Doo is in de zwatt Stroph von Sanftmut unn Barmherzischkeit die Redd unn dess all unser Not e End hawwe soll...
-Isch habb´s kabbiert, saacht er Ja, es iss ookumm. Ja isch habb was. Unn es betrifft aach disch. Unn isch will´s jetzt aach mit dir beredde...
Die alte Lieder vun voorgeschtern?
Noo, wonn de doi Deer uffmachst, konn´s bassiern, dess ebbes gonz unn gar Menschlisches met oom Schlaach ziemlisch himmlisch wird...
Unn es bleibt barmherzisch und sanftmütisch t in unserer Welt.
Also: Lossen uns die Deer uffmache...